MULA sa kasalukuyang tatlong-taon, nais ni Senador Jinggoy Ejercito Estrada na palawigin sa limang taon ang bisa ng lahat ng Professional Identification Cards (PICs) na ibinibigay ng Professional Regulation Commission (PRC).

"Malaking kaginhawaan ito para sa mga propesyonal dahil hindi na mapapadalas ang kanilang renewal transactions. Magiging mas madali pa ang pagkuha ng appointment sa kanilang napiling petsa at satellite office o service center," sabi ni Estrada.

"Mababawasan din ang gastos sa pagre-renew ng PICs at makapagbibigay pa ito ng sapat na panahon para sa mga propesyonal na tuparin ang kanilang mga Continuing Professional Development (CPD) requirements," dagdag pa ng senador.

Bagama't may online services ang PRC, may ilang propesyonal na nakararanas ng problema sa pagkuha ng appointment sa kanilang napiling petsa para sa renewal ng kanilang PIC kaya't napipilitan pa silang magbiyahe sa malayong satellite office o service center ng PRC.

Bukod dito, kinakailangan pa nilang mag-leave sa trabaho para makumpleto ang proseso dahil ang renewal ay ginagawa lamang mula Lunes hanggang Biyernes.

Kasalukuyang nasa P420 hanggang P450 ang binabayaran sa pag-renew ng PICs na valid sa loob ng tatlong taon.

"Hindi na mapapadalas ang renewal transaction kung mas mahaba ang validity at mababawasan din ang gastusin ng mga propesyonal at malaking kaluwagan ito sa kanila," ani Estrada.

"Kung ang driver's license at passports ay pinalawig ang validity period para sa kaluwagan ng mga nagmamay-ari nito, maging ng mga ahensya natin na nagpo-proseso ng mga dokumento, bakit hindi natin gawin din ito sa mga PIC holders? Wala akong nakikitang masama sa pagpapalawig ng validity period ng PICs," dagdag pa nito.

SOURCE: https://legacy.senate.gov.ph/press_release/2024/0627_estradaj1.asp